A.G.B.U. Vatche & Tamar Manoukian High School

Skip to main content
Main Menu Toggle
Armenian Independence Day - No School, Friday, September 22

10-րդ Դասարանցիները Գրական Յայտագիր Ներկայացուցին Արարատ Տան Մէջ

Մեր վարժարանի 10-ր դասարանի յառաջադէմ խումբը (honors) գլխաւորութեամբ հայերէնի ուսուցիչ Պարոն Նորայր Տատուրեանի, այս տարի եւս այցելեց Միշըն Հիլզ քաղաքի «Արարատ Տուն»ը եւ հոն բնակող մեծ մայրերուն, մեծ հայրերուն ներկայացուց հայկական քնարական բանաստեղծութիւններու ընտրանի մը: Յայտագիրը կոչուած էր «Պտոյտ Մը Հայկական Քնարերգութեան Մէջ - Մեր Սիրոյ Աշունը»: Խումբը եւ վարժարանը ունկնդիրներուն ներկայացուց հաստատութեան մշակութային ձեռնարկներու պատասխանատուն՝ Տիկին Վեհանուշ Եամալեանը: Ան իր կարգին շնորհաւորեց եւ շատ բարձր գնահատեց աշակերտներուն նուիրուածութիւնը եւ պատրաստուածութիւնը:
 
Աշակերտները արտասանեցին Մեծարենցէ, Վարուժանէ, Թէքէեանէ, Իսահակեանէ, Չարենցէ, Տէրեանէ, Զարիֆեանէ, Թումանեանէ բանաստեղծութիւններ: Անոնց կ'ընկերանար երաժշտութիւն, դաշնակ՝ Նանօր Տէր-Պետրոսեան եւ Էթան Քէշիշեան, կիթառ՝ Նարեկ Տատուրեան եւ Յովիկ Մանոյեան: Աշակերտները նաեւ երկխօսութիւններու վերածեցին ու բեմականացուցին աշուղ Նահապետ Քուչակի սիրային հայրենները: Յայտագրին մէջ կար նաեւ թատերական պատկեր մը՝ Լ. Շանթի «Հին Աստուածներ»էն, իշխանուհիի եւ վանահօր տեսարանը: Իսկ Նանօր Տէր-Պետրոսեանը մեներգեց Կոմիտաս վարդապետի «Հոռովել»ը:
 
Անհատական կատարումներէ ետք աշակերտները ներկայացուցին երկու խմբային արտասանութիւն. «Մարտիկի Երգը» եւ «Ես Իմ Անուշ Հայաստանի»ն:
 
Յայտագրի աւարտին արժանաշնորհ Տէր Երեմիա Քահանայ Խաչատրեանը բեմ եկաւ սրտի խօսքի համար: Ան պատմեց, թէ ինչպէս երբ ի'նքն ալ աշակերտական տարիքի էր, իր հոգին կը մեծնար նոյն բանաստեղծութիւններու շունչով ու ան կը դառնար հայասէր եւ տոհմիկ ինքնութեան տէր պատանի մը: Քահանայ հայրը ապա իր աղօթքով օրհնեց բոլոր աշակերտները ու անոնց մաղթեց նորանոր յաջողութիւններ:
 
Յիշենք նաեւ, թէ աշակերտները այդ օր առիթը ունեցան այցելելու Արարատ Էսքիճեան թանգարանը, որ կը գտնուի «Արարատ Տուն» համալիրին մէջ: Խումբը, թանգարանի տնօրէն տիկին Մէկի Մանկասարեանի ուղեկցութեամբ մօտէն ծանօթացաւ հայկական բազմաթիւ թանկագին առարկաներու: