A.G.B.U. Vatche & Tamar Manoukian High School

Skip to main content
Main Menu Toggle
PSG Luncheon, Friday, November 17, Dismissal at 2:00 PM

10-րդ Դասարանցիները Գրական Յայտագիր Ներկայացուցին Արարատ Տան Մէջ

Մեր վարժարանի 10-ր դասարանի յառաջադէմ խումբը (honors) գլխաւորութեամբ հայերէնի ուսուցիչ Պարոն Նորայր Տատուրեանի, այս տարի եւս այցելեց Իկըլ Ռաք քաղաքի «Արարատ Տուն»ը եւ հոն բնակող մեծ մայրերուն, մեծ հայրերուն ներկայացուց հայկական քնարական բանաստեղծութիւններու ընտրանի մը, որուն անունն էր «Մեր Սիրոյ Աշունը»: Խումբը եւ վարժարանը ունկնդիրներուն ներկայացուց հաստատութեան մշակութային ձեռնարկներու պատասխանատուն՝ Տիկին Այտա Եղիայեանը: Ան իր կարգին շնորհաւորեց եւ շատ բարձր գնահատեց աշակերտներուն նուիրուածութիւնը եւ պատրաստուածութիւնը:
 
Աշակերտները արտասանեցին Մեծարենցէ, Վարուժանէ, Թէքէեանէ, Իսահակեանէ, Չարենցէ, Տէրեանէ, Զարիֆեանէ, Թումանեանէ բանաստեղծութիւններ: Անոնց կ'ընկերանար երաժշտութիւն, դաշնակ՝ Նանօր Տէր-Պետրոսեան եւ Էթան Քէշիշեան, կիթառ՝ Նարեկ Տատուրեան եւ Յովիկ Մանոյեան: Աշակերտները նաեւ երկխօսութիւններու վերածեցին ու բեմականացուցին աշուղ Նահապետ Քուչակի սիրային հայրենները: Յայտագրին մէջ կար նաեւ թատերական պատկեր մը՝ Լ. Շանթի «Հին Աստուածներ»էն, իշխանուհիի եւ վանահօր տեսարանը: Իսկ Նանօր Տէր-Պետրոսեանը մեներգեց Կոմիտաս վարդապետի «Հոռովել»ը:
 
Անհատական կատարումներէ ետք աշակերտները ներկայացուցին երկու խմբային արտասանութիւն. «Մարտիկի Երգը» եւ «Ես Իմ Անուշ Հայաստանի»ն:
 
Յայտագրի աւարտին աշակերտները Արարատ Տան նուիրեցին շրջանաւարտուհի Ալիք Թոքաթլեանի պատրաստած գեղարուեստական մէկ պաստառը՝ «Իմ Քարէ Երկիր», որուն վրայ տաղանդաւոր լուսանկարչուհին տեղադրած էր Հայաստանի տեսարժան վայրերը: