AGBU Vatche & Tamar Manoukian High School

Skip to main content
Main Menu Toggle
Winter Formal, Friday, January 24, 7:00 PM

Վերամուտ ՀԲԸՄ Վաչէ Եւ Թամար Մանուկեան Երկրորդական Վարժարանի 2017-2018 Տարեշրջանի

Վերամուտի պաշտօնական արարողութիւնը տեղի ունեցաւ «Պօյաճեան» սրահին մէջ, ի ներկայութեան՝ Ս. Գրիգոր Լուսաւորիչ եկեղեցւոյ հոգեւոր հովիւ Արժ. Տ. Սարգիս Աւ. Քհնյ. Բեթոյեանի, Վարժարանի հոգաբարձական կազմի, նորանշանակ տնօրէն՝ տիար Մայքըլ Փրաթի, վարժարանիս ուսուցչական կազմի, ծնողներու, շրջանաւարտից միութեան անդամներու եւ աշակերտութեան։
 
Աշակերտական Խորհուրդի ատենապետուհին՝ Թամար Տօնոյեան, նախ բարի գալուստ մաղթեց ներկաներուն, ապա՝ հրաւիրեց բոլորը որ յոտնկայս արտասանեն Տէրունական Աղօթքը, դպրոցական ուխտերը եւ երգեն Վարժարանիս քայլերգը։
 
Նախ բեմ հրաւիրուեցաւ գաղութիս հոգեւոր հովիւ՝ Արժ. Տ. Սարգիս Աւ. Քհնյ. Բեթոյեան: Ան իր սրտի խօսքը ուղղեց աշակերտներուն եւ քաջալերեց զիրենք, որ լաւ քրիստոնեայ եւ լաւ մարդ դառնան իրենց վարքով ու ապրելակերպով։ Ապա խօսք առաւ Կրթական Համակարգի եւ Աշակերտական Հարցերու պատասխանատու՝ տիկ. Գոհար Ստամբուլեանը, որ խօսեցաւ դասարաններու դասաւորման եւ կատարուած կրթական համակարգի փոփոխութիւններու մասին։ Ապա ան բեմ հրաւիրեց Վարժարանիս Հոգաբարձութեան հիմնադիր անդամ եւ կրթական յանձնախումբի ատենապետուհի դոկտ. Սիլվա Գարայեանը, որպէսզի իր սրտի խօսքը ուղղէ աշակերտներուն։
 
Դոկտ. Գարայեան նախ յատուկ կերպով ողջունեց իններորդ դասարանի նոր աշակերտները, յետոյ՝ աւարտական դասարանի աշակերտները, եւ բարի գալուստ մաղթեց բոլորին: Ան խորունկ համոզումով եւ մեծ խանդավառութեամբ վստահեցուց բոլոր ներկաները, թէ շնորհիւ բարերարներուն՝ տէր եւ տիկին Վաչէ եւ Թամար Մանուկեան ամոլին ցուցաբերած նիւթաբարոյական աջակցութեան, նշանակուած նոր տնօրէնին եւ ուսուցչական կազմին՝ այս Վարժարանը կը դառնայ լաւագոյն վարժարանը մեր համայնքէն ներս։ Եւ Դոկտ. Գարայեան շեշտեց. «Այս Վարժարանը Հայկական դպրոց է, իր նկարագրով եւ էութեամբ։ Այս վարժարանին նպատակն է աշակերտներուն հայեցի դաստիարակութիւն ջամբել, իրենց մէջ ազգային նկարագիրը զօրացնել, ինչպէս նաեւ՝ լաւ քաղաքացիներ պատրաստել։ Մեծ փոփոխութիւններ պիտի բերենք այս դպրոցին, եւ այդ փոփոխութիւնները արդէն սկսած են»։ Ապա ան ներկայացուց Վարժարանիս նոր տնօրէնը՝ տիար Մայքըլ Փրաթը, զինք համարելով իբրեւ եզակի կարողութիւն ու բնաւորութիւն ունեցող եւ կրթական ու դաստիարակչական մարզէն ներս տարիներու վաստակ ունեցող անձնաւորութիւն մը։
 
Տիար Մայքըլ Փրաթ իր արտասանած խօսքին մէջ ամփոփ գիծերով նախ ինքզինք ներկայացուց։ Ան ծագումով կէս յոյն է։ «Ես մեծ յարգանք ունիմ ձեր հարուստ մշակոյթին։ Ազգային ժառանգութիւնը մեծ նուէր մըն է ու ձեր մշակոյթը, ձեր ժառանգութիւնը ձեզի ձեր նախահայրերէն մնացած անգին գանձ մըն է։ Պէտք է որ տէ՛ր կանգնիք անոր», շեշտեց ան։ Այս խօսքերէն ետք Թամար Տօնոյեանը եռագոյն փողկապ մը նուիրեց տնօրէնին:
 
Հոգաբարձական Խորհուրդի համա-ատենապետ՝ տոքթ. Էրիք Իսրայէլեան քաջալերող պատգամ մը փոխանցեց աշակերտներուն. «Ես շատ ուրախ եմ, որ այսօր նոր ու լուսաւոր էջ մը կը բացուի դպրոցի պատմութեան մէջ։ Մենք ո՛չ թէ պարզապէս լաւ պիտի ըլլանք, այլ՝ ամբողջ շրջանին լաւագոյնը։ Ասիկա է վարժարանիս բարերարներուն, հոգաբարձութեան ու տեսչութեան տեսիլքը։ Դուք, սիրելի՛ աշակերտներ, մտաւոր կրթութեան կողքին մշակութային ժառանգութիւնը ստանալու առաւելագոյնին մէջ էք։ Պրն. Փրաթը նոր շունչ ու նոր խանդավառութիւն պիտի բերէ այս վարժարանին, պահելով հայկական դիմագիծը»:
 
Վարժարանիս տնօրէնը՝ տիար Մայքըլ Փրաթ, շնորհակալութիւն յայտնելէ ետք արտասանուած այդ խօսքերուն համար՝ պաշտօնապէս բացուած յայտարարեց 2017-2018 ուսումնական-կրթական տարեշրջանը։ Աշակերտները մեծ խանդավառութեամբ իրենց դասարանները անցան, իսկ տնօրէնը ընդունելութիւն մը ունեցաւ ծնողներուն հետ։
 
Լուսաւոր եւ բազմաբեղուն վերամուտ կը մաղթենք ՀԲԸՄ-ի Վաչէ եւ Թամար Մանուկեան Վարժարանի մեծ ընտանիքին։