AGBU Vatche & Tamar Manoukian High School

Skip to main content
Main Menu Toggle
Winter Formal, Friday, January 24, 7:00 PM

Վեհափառի Հետ Հանդիպում

Ամենայն հայոց վեհափառ Գարեգին Բ. կաթողիկոսը Արեւմտեան թեմի հիմնադրութեան 90-ամեակի տօնակատարութիւններու ծիրէն ներս այս շաբաթ հովուապետական այցելութիւն մը տուաւ Լոս Անճելըս: Այս բացառիկ առիթով Վեհափառ հայրը փափաքած էր գաղութիս բոլոր հայկական վարժարաններու աշակերտութեան հետ անմիջական եւ ջերմ հանդիպում մը ունենալ, զրուցել անոնց հետ եւ լսել անոնց հարցումները:
 
Մեր վարժարանն ալ իր ամբողջ աշակերտութեամբ մասնակցեցաւ այս յատուկ եւ բացառիկ միջոցառումին ու ոգեւոր աղօթքով եւ երգով հանդիպեցաւ Վեհափառ Հօր: Հարց ու պատասխանի բաժնին աւարտական դասարանի աշակերտ Դաւիթ Քէշիշեանը ուղղեց իր հարցումը, որմէ ետք Դաւիթը, վարժարանի անունով Վեհափառ հօր նուիրեց յուշատախտակ մը, որուն վրայ փորագրուած էր. «Հայաստան 7201 մղոն»: Դաւիթը հետեւեալ ձեւով բացատրեց այդ նուէրին իմաստը. «Հակառակ անոր, որ մենք 7201 մղոն հեռու ենք Ս. Էջմիածինէն, բայց սրտով շատ մօտ ենք»:
 
Աւարտին, Վեհափառ հայրը տուաւ իր օրհնութիւնները եւ յաջողութիւն մաղթեց բոլոր աշակերտներուն: Ան բոլոր վարժարաններուն նուիրեց հայկական խաչքարի մը շրջանակուած գեղանկարը: Իսկ աշակերտները միաբերան երգեցին Հայրապետական մաղթերգը:
 
Յաւելեալ նկարներու համար հաճեցէք ստուգել մեր պատկերատետրը:
 
Նոյն պատկերատետրը կարելի է նաեւ գտնել դպրոցի դիմատետրին վրայ: