AGBU Vatche & Tamar Manoukian High School

Skip to main content
Main Menu Toggle

Մեր Սիրոյ Գարունը: Պտոյտ Մը Հայկական Քնարերգութեան Մէջ

Երեկոն կոչուած էր «Մեր Սիրոյ Գարունը: Պտոյտ Մը Հայկական Քնարերգութեան Մէջ»: Այս տարի հինգերորդը կատարուող յայտագրին ներկայ էին աշակերտներու ծնողները, հարազատները, հիւրեր, նախապէս նոյն ծրագրի մէջ բաժին առած շրջանաւարտներ, ինչպէս նաեւ վարժարանի տնօրէնը, պարոն Մայքլ Փրէթը:
 
Յայտագիրը սկսաւ «Վահագնի Ծնունդը» քերթուածով, գիտակցելով, թէ, այդ հնագոյն կտորի մէջ են հայկական քերթողութեան ակունքները: Ապա հնչեցին Մ. Մեծարենցի, Վ. Թէքէեանի, Դ. Վարուժանի, Վ. Տէրեանի, Յ. Թումանեանի, Աւ. Իսահակեանի եւ Ե. Չարենցի քերթուածները: Այս տարի աշակերտները նաեւ երկխօսութիւններու վերածելով բեմականացուցին Նահապետ Քուչակի սիրային հայրեններու ընտրանի մը: Յայտագրի մէջ տեղ գտած էր նաեւ Լեւոն Շանթի «Հին Աստուածներ» թատերախաղէ պատկեր մը՝ Մարիամ իշխանուհիի եւ Յովհաննէս վանահօր երկխօսութիւնը: (Դերուսոյց՝ Արամ Քույումճեան) 19րդ դարու քնարական բոյրը տալու համար աշակերտները նաեւ պատրաստած էին վալս մը, զոր պարեցին Արամ Խաչատուրեանի «Դիմակահանդէս»-ի յայտնի եղականի ընկերակցութեամբ: (Պարուսոյցներ՝ Փաթիլ եւ Սինթիա Ալպարեան քոյրեր)
 
Յայտագրի վերջին հանգրուանին աշակերտները հնչեցուցին Եղիշէ Չարենցի «Պատգամ»-ը եւ «Ես իմ անոյշ Հայաստանի» քերթուածը: Աւարտին անոնք միաբերան եւ ուս-ուսի երգեցին Ռ. Հախվերդեանի «Մեր Սիրոյ Աշունը» երգը:
 
Կատարումներուն դաշնակով եւ կիթառով ընկերակցեցան դպրոցի մէջ յայտնուած տաղանդներ՝ Սէրա Այնթապլեանը, Լարա Խորխորունին (12րդ դասարան), Նարեկ Տատուրեանը (11րդ դասարան) եւ Սեդրակ Քէշիշեանը:
 
Յայտագիրը ունէր նաեւ ուսուցողական նպատակ, ուր իւրաքանչիւր աշակերտ ներկայացուց իր բանաստեղծութիւնը, պատմեց, թէ ինչո'ւ ընտրած էր այդ կտորը ու խօսեցաւ գրականագիտական գիտելիքներու մասին, ինչպէս՝ պղատոնական սէր, հնչեակ, հայրեն, քառեակ, քնարերգութիւն, բաղաձայնութիւն, ելն.:
 
Իր հուսկ բանքին մէջ դասարանի ուսուցիչ եւ «Հայկական Քնարերգութիւն» ծրագրի հեղինակ Նորայր Տատուրեանը արտայայտուեցաւ այսպէս. «Մեր յայտագիրը այժմ կը վերջանայ, բայց նոր կը սկսի այս 11 պատանիներու նաւուղղութիւնը հայկական քնարերգութեան ծովուն մէջ: Մենք կը հաւատանք, թէ ընտիր բանաստեղծութիւնը զանոնք կը դարձնէ ազնիւ անձեր: Այս բանաստեղծութիւններու հիման վրայ անոնք պիտի շարունակեն կառուցել հայկական ինքնութիւնը եւ հայրենի պատկանելիութիւնը»:
 
Նկատի առնելով որ յայտագիրը մայրերու օրուան նախօրեակին էր, աշակերտները իրենց մայրերուն նուիրեցին ծաղիկներ, որոնց վրայ գրած էին սիրային տողիկ մը:
 
Լայն գնահատանք գտած յայտագիրը հրաւիրուած է զոյգ Արարատ տուներ (Միշըն Հիլզ, Իկըլ Ռաք), Իրանահայ միութիւն եւ ՀԲԸ Միութեան Երեաւնի գրասենեակին կողմէ՝ Հայաստան (2019ին):