AGBU Vatche & Tamar Manoukian High School

Skip to main content
Main Menu Toggle
Open House, Saturday, December 1, 10:00 AM

Ծնունդդ Շնորհաւոր «Վարդագոյն Քաղաք»

Այս բացառիկ օրը առիթ տուաւ, որ աշակերտութեան եւ հայկական բաժանմունքի շուրջ համախմբուին ու հայաշունչ այդ մթնոլորտին ականատես ըլլան բազմաթիւ ծնողներ, մեծ հայրեր ու մեծ մայրեր, ինչպէս նաեւ վարժարանիս համակիր հիւրեր, հոգաբարձութեան կրթական բաժնի ատենապետուհի Տոքթ. Սիլվա Գարայեան եւ Յովսէփեան միջնակարգ վարժարանի 8րդ դասարանի սաներ:
 
Երեւանի «տարեդարձը» սկսաւ հակիրճ բացման խօսքով մը, զոր կատարեց բաժանմունքի վարիչ՝ Օր. Լորա Գույումճեանը: Ապա հանդիսական սայլով սրահ մտաւ Արգիշտի թագաւորը: Ան յորդորեց, թէ հիմնած է Էրեբունին՝ Խալտի աստուծոյ հոգածութեամբ եւ այդ քաղաքը հազարամեակներ պիտի ծաղկի: Ապա հանդէս եկաւ Պրն. Պարթեւ Կիւլիւմեանի ղեկավարած երգչախումբը: Անոնք երգեցին Երեւանին նուիրուած յայտնի երգեր: 11րդ եւ 12րդ դասարաններէ կազմուած խումբ մը աշակերտներ Երեւանին նուիրուած տողիկներ արտասանեցին: Անոնց հետեւեցաւ օրուան հիւր երգիչը՝ Ժոզէֆ Գրիգորեանը: Ան հայրենասիրական երգերով խանդավառեց ամբողջ Պօյաճեան սրահը: Հայերէնի ուսուցիչ Նորայր Տատուրեանը օրուան համար պատրաստած էր Երեւանի հին ու նոր լուսանկաներու ցուցադրութիւն մը: Աշակերտները զարմանալով դիտեցին, թէ ինչքա՛ն փոխուած էր Հայաստանի մայրաքաղաքը: Ցուցադրութեան իր մեղմօրօր ձայնով ընկերակցեցաւ Փալինա Եթզան: Ան մեներգեց Թաթայի «Երեւանս, Երեւանս» երգը:
 
Յայտագրին առաջին բաժինը վերջ գտաւ, երբ Երեւանի հիմնադիր թագաւորը իր պատուիրակներով հրաժեշտ տուաւ սրահին: Այնուհետեւ, տօնակատարութիւնը շարունակուեցաւ բակին մէջ: Պարուսոյց Թագուհի Պէզաթեանի խմբավարած պարախումբը աշխոյժ ներկայացում մը կատարեց: Այդ խանդավառութեան մէջ աշակերտներն ու հիւրերը վայելեցին թարմ լաւաշը, հայրենաշունչ երաժշտութիւնը եւ աշխարհի հնագոյն մայրաքաղաքներէն մէկուն՝ Երեւանին տարեդարձը տօնելու բացառիկ առիթը:
 
Տօնակատարութիւնը իր գագաթնակէտին եւ աւարտին հասաւ դպրոցական մեծ շուրջպարով:
 
Մեր վարժարանը անգամ մը եւս փաստեց, թէ որքա'ն սրտաբուխ եւ վառ է հայկական ինքնութիւնը մեր դարպասէն ներս ու աշակերտները հայկական բաժանմունքի առաջնորդութեամբ՝ լիովին կը վայելեն այդ ոգին:
 
Ծնունդդ շնորհաւոր սիրելի Վարդագոյն քաղաք: