AGBU Vatche & Tamar Manoukian High School

Skip to main content
Main Menu Toggle
Open House, Saturday, December 1, 10:00 AM

Անկախութեան 27ամեանի Տօնակատարութիւն

Այս շաբաթ ամբողջ դպրոցով եւ մեծ ոգեւորութեամբ՝ երգով, պարով եւ խօսքով տօնեցինք մեր երիտասարդ հանրապետութեան անկախացման նորագոյն տարեդարձը:
 
Մեր յայտագիրը սկսաւ ՀԲԸՄ սկաուտներու կատարած դրօշակի հանդէսով, որուն յաջորդեց Հայաստանի օրհներգի միասնական կատարումը: Ապա հայերէնի ուսուցիչ պարոն Նորայր Տատուրեանը հայ ազգի առաջին անկախութեան՝ Հայկի ազատատենչ կռիւի օրինակը վկայակոչելով, աշակերներուն ցոյց տուաւ, թէ անկախութիւնը հայուն տրուած պարգեւ մը չէ, այլ՝ ազգի ծիներու մէջն է ան ու ինքնութեան առանցքը: Այս խօսքերէն ետք, յաջորդաբար անգլերէն եւ հայերէն յօդուածներ ընթերցեցին Նիքոլ Կարապետեանն ու Ալեք Պապիկեանը: Անոնք անկախ Հայաստանը եւ անոր նուաճումները նկարագրեցին:
 
Ապա բեմ բարձրաձաւ երգչախումբը՝ պարոն Պարթեւ Կիւլիւմեանի ղեկավարութեամբ եւ պարախումբը՝ տիկին Թագուհի Պէզաթեանի առաջնորդութեամբ: Մեր խոստումնալից տաղանդները հայաշունչ երգեր եւ խմբապարեր կատարեցին: Պարախումբէն Մանուշակ Արապեանը կատարեց նաեւ մենապար մը՝ «Կապոյտ թռչուն», որ պարեգրուած է Խաչատուր Աւետիսեանի նոյնանուն երգի վրայ: Իսկ Շանթ Գըլըճեանը արտասանեց Յովհաննէս Գրիգորեանի «Սա իմ երկիրն է» հայրենանուէր բանաստեղծութիւնը:
 
Յայտագիրը նոր թափ առաւ երբ աշակերտութիւնը միաբերան հնչեցուց Հայ աշակերտի ուխտը, ապա դրօշակներ ծածանելով շուրջպար պարեցին:
 
Կը շնորհաւորենք Հայաստանի անկախութեան 27ամեակը ու կը փափաքինք նոյն եռանդով նորերը տօնել: