AGBU Vatche & Tamar Manoukian High School

Skip to main content
Main Menu Toggle
Toy Drive Deadline, Monday, December 10

Նոճիները Կը Շարունակեն Ներշնչել Մեր Աշակերտները

«Գեղապաշտ գրականութիւն» դասախօսութիւններու ծիրէն ներս 10-րդ դասարանը այս շաբաթ ընթերցեց 19րդ դարու պոլսահայ բանաստեղծ Տիրան Չրաքեանի «Նոճիներէն Ներշնչում» բանաստեղծութիւնը: Սերտողութեան աւարտին փափաքեցանք այդ խորհրդաւոր ծառերը անձամբ տեսնել ու հիանալ անոնց տեսքին: Ուստի, հրաժեշտ տուինք դասասենեակին ու սկսանք քալել դէպի Մարթելօ փողոցի խաչմերուկին վրայ գտնուող այն տունը, որուն պարտէզին մէջ հասակ նետած են երկնասլաց հինգ սեւ նոճիներ: Արմէն Խաչիկեանը, ըստ մեր նախկին որոշումին, հաշուեց քայլերը (411 քայլ), Աւօն դարձաւ մեր լուսանկարիչը, Նաթալին եւ Սուզին սիրեցին տետրակին մէջ գծագրել այդ ներշնչող տեսարանը, իսկ Հայքօն, երազկոտ աշակերտ, իր երկու ձեռքով բարձ շինած՝ դիտեց ծառերը: Այս աւանդական «ուխտագնացութեան» ընթացքին աշակերտները նոճիներու մասին բուսաբանական եւ դիցաբանական գիտելիքներ լսեցին, հարցարան լեցուցին ու նկարագծեցին այդ գեղեցկութիւնները:
 
Յոյս ունինք, թէ մեր աշակերտները այս պտոյտէն ներշնչուելով՝ գնահատեն բնութեան անկեղծ գեղեցկութիւնները եւ հոն գտնեն կեանքի ճշմարտութիւնները: